منتديات عـلاء عاطف

منتديات عـلاء عاطف



    عادات أهل مكه في المناسبات

    شاطر
    avatar
    علاء عاطف
    ريـس مجــلــس الادارة
    ريـس مجــلــس الادارة

    ذكر عدد الرسائل : 319
    نقاط : 32462
    تاريخ التسجيل : 16/12/2008

    default عادات أهل مكه في المناسبات

    مُساهمة من طرف علاء عاطف في الخميس ديسمبر 18, 2008 3:22 pm

    صبحكم الله بالخير جميعا
    lol!

    الأكلات المكية لها طعم ونكهة ونشأة
    واللي تحلي الأكلات وتطعمها زيادة إنو لكل أكلة مناسبة تتعلق بيها
    وما ناكلها إلا في المناسبة حقتها

    نحنا كدة المكاوية وبالزات العتقية القدم لنا تصانيف وتباتيك في الاكل والشرب مايعلم بيها الا الله عز وجل
    ماشية معانا من أيام ما فنو الأوادم



    أقروا الموضوع ومخمخو وبعدين قولوا رأيكم عن هادي العادات




    الأكلات المكية ترتبط بعادات ومناسبات يعني كل اكلة ولها مناسبة زي أيش ؟؟؟

    هيا خدو عندكم ....

    1/الرز البحمبص والسقط والمعرق أو المختوم والششني هادي الأكلات خاصة بالعزا وزيادة في التوضيح
    اليوم الأول والتاني والتالت يطبخو الرز البحمبص واليوم التالت اللي يسموه قطع العزا يسوو الششني والمعرق والمختوم والسقط

    2/الكابلي أو الزربيان والسمبوسك والطورمبة هادي يسووها وقت المناسبات والأفراح للرجال
    أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال بس يسووقليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتكان او الموز تسوي صينية علشان يحلو بيها
    بعدين فن علين الميز والشغلات الجديدة هادي


    3/المعدوس ( الرز عدس ) هادا يسووه المكاويه يوم الغيم والمطر ومعاه روبيان مكشن بالقوطة والبصل والفلفل الأخضر وزلطة حمر
    وكيف لو كنا ساكنين في بلاد الخواجات على كدة كل يوم معدوس علين البطن تسير زي الطبلة

    4/الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع

    5/الحليب أبو الهيل هادا برضو كمانة ينشرب في صبحية أول يوم في السنة الهجرية الجديدة

    6/السليق هادا يسووه في المناسبات لمن يكون الجو باااااااااااااااااارد زي هادي الأيام

    7/الدبيازة معروفة على ما أعتقد للجميع يسووها للفطور أول يوم العيد

    8/المعمول والغريبة يسووها في أيام الحج

    9/السمك مايتاكل إلا في الشعبنة علشان في رمضان
    الناس ماتاكل السمك بس هيا كدة عادة
    شعبنة يعني اضرب سمك وصيادية

    10/عشرة عاشورا ( 10 محرم ) رز زربيان الحلو
    وزلطة لبن أبو الفلفل

    11/السحلب يسووه في الأيام الباردة زي دحين علشان يلم العضم ويدفي الجتة بالزات لو فيلو شوية جنزبيل

    12/القهوة الملوزة اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق
    لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة

    13/وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة

    14/المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها

    15/ الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد


    16/ السلالي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن
    كل شي يتاكل فيه علين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير
    ههههههههههههه



    طبعا في السنة الجديدة


    زي ما ذكر الثوب الجديد لزم يكون ابيض ياويله لو احد مو لبس جديد :592:

    تاني شئ لزم الحليب

    الثالث الملوخية على الغذاء

    من تفاولات اهل مكة في السنة الجديدة يصومة قبلها بيوم وفي اول يوم في محرم يصومة

    طبعا مافي حديث على هذا

    والذهاب الى المدينة المنورة

    وكمان الذبح

    زي ماشفتو الأكلات اللي قلنا عليها لها مناسبة أو وقت معين تتاكل فيه
    مع انو يمدينا ناكلها طووووووووووول السنة مو مشكلة ويمكن كتير ناس هجروا
    وفلتو تباتيك زمااان الا مارحم الله بس هيا زي ماتقولوا شغلة تعود

    وعلى قولة المسل الله لايقطع العادة إلا بسلااامة

    وأنا من عادتي لمن أغلق أقلكم
    في وداعة الرحمن
    دعواااااااااااااتكم
    avatar
    اموااج
    مشرف قسم الصور
    مشرف قسم الصور

    انثى عدد الرسائل : 77
    نقاط : 32064
    تاريخ التسجيل : 18/12/2008

    default رد: عادات أهل مكه في المناسبات

    مُساهمة من طرف اموااج في الأربعاء فبراير 25, 2009 6:32 pm

    علاء عاطف
    ايها العطر

    يعطيك الف عافية على الموضوع القيم
    تحياتي
    avatar
    يوسف داوود2

    ذكر عدد الرسائل : 2
    العمر : 31
    نقاط : 30784
    تاريخ التسجيل : 23/04/2009

    default رد: عادات أهل مكه في المناسبات

    مُساهمة من طرف يوسف داوود2 في الخميس أبريل 23, 2009 4:19 am

    يعطيك العافيه علاء عاطف موضوع رائع
    دائماً انت الافضل بمواضيعك شكر على ما قدمت
    avatar
    علاء عاطف
    ريـس مجــلــس الادارة
    ريـس مجــلــس الادارة

    ذكر عدد الرسائل : 319
    نقاط : 32462
    تاريخ التسجيل : 16/12/2008

    default رد: عادات أهل مكه في المناسبات

    مُساهمة من طرف علاء عاطف في الخميس أبريل 23, 2009 8:07 pm

    الف شكـرا اخـؤ

    يوسف على الــــرد الذوق اللة يعطيك الف عافيـــة


    تحياتـــي ..علاء عاطف

      الوقت/التاريخ الآن هو الثلاثاء سبتمبر 26, 2017 2:48 am